Дунёда аҳоли сони ўсиб борар экан, у билан параллел равишда электр энергияга бўлган эҳтиёж ҳам ошади. Ер юзидаги табиий ресурсларнинг чегаралангани, инсониятни янги энергия манбаларини излаб топишга ундамоқда. Дунёнинг 1-рақамли мамлакатига айланиш учун курашаётган Хитой айни шу соҳада катта ютуқларга эришди.  

Жорий йилнинг февраль ойида Ўзбекистондаги етакчи оммавий ахборот воситалари вакиллари ҳамда турли вазирлик матбуот котиблари иштирокида Хитойдаги йирик электр энергия ишлаб чиқарувчи компанияларга пресс-тур ташкил этилди.

Сафаримизнинг илк ташрифи Пекин шаҳридаги “China Energy Engineering Corporation” компаниясига бўлди. Мазкур компанияда 120 минг нафар ишчи-ходим фаолият юритади. Унинг умумий активлари қиймати 154 млрд АҚШ долларига тенг бўлиб, электр энергетикаси бўйича дунёнинг барча қитъасида 140 дан ортиқ давлатларда лойиҳаларни амалга оширган.

Мазкур компания Марказий Осиёдаги энг йирик лойиҳалардан бўлган Қашқадарё ва Бухоро вилоятларида қуёш электр станциялари, шунингдек, Сирдарё вилоятида барпо этилаётган иссиқлик станцияси қурилиб фойдаланишга топширилишида асосий хорижий ҳамкор ҳисобланади.

Ўзбекистон ва Хитой ҳамкорлиги янги босқичга чиқмоқда. Хитой компаниялари Ўзбекистон ҳукумати томонидан яратиб берилган барча қулайликлардан баҳра олмоқда. Шу нуқтаи назардан “China Energy” компанияси ҳам Ўзбекистонда ўз фаолиятини ривожлантирмоқда. Ҳозир биз инженерлар тайёрлаш бўйича Ўзбекистондаги университетлар билан ҳамкорликда иш олиб бормоқдамиз. Биз Ўзбекистоннинг иқтисодий ва ижтимоий ривожланиши учун ўз ҳиссамизни қўшмоқчимиз, – дейди Хитой халқаро энергетика корпорацияси бошқаруви раиси Лу Зехианг.

Юқори кучланишдаги электр энергияни тақсимлаш учун улкан ҳажмдаги трансформаторлар зарур. Навбатдаги манзилимиз шундай трансформаторлар ишлаб чиқарувчи Хитойнинг China ХD компанияси бўлди. Ушбу компания 20 кW трансформатордан тортиб, энг йирик кучланишдаги 1100 кW трансформаторларни ишлаб чиқаради.

Пресс-тур давомида навбатдаги локация Хитойнинг Сиан шаҳрида жойлашган “LONGI” компаниясининг бошқарув офиси бўлди. “LONGI” қуёш панеллари бозорида йирик компания сифатида кучли брендлар қаторига киради ва у кетма-кет уч йил давомида қуёш модулларини катта ҳажмда етказиб бериш билан етакчилик қилиб келади.

Мазкур компания Ўзбекистонда ҳам бир қатор “яшил” энергетика лойиҳаларида қатнашиб келмоқда. Мисол учун, Хитойнинг “China Gezhouba Group” компанияси томонидан Нишон ва Қоровулбозор туманларида барпо этилаётган, ҳар бирининг қуввати 500 МВтдан бўлган йирик қувватли қуёш фотоэлектр станциялари учун қуёш панелларини етказиб бермоқда.

Маҳсулотларимизни дунёнинг 150 дан ортиқ давлатига сотамиз. Яқинда Ўзбекистон президенти Шавкат Мирзиёевнинг Хитойга давлат ташрифи доирасида Ўзбекистонда қайта тикланувчи энергия манбаларини трансформация қилиш бўйича энергетика вазирлиги билан алоқалар олиб бордик. Биз қуёш панелларини ишлаб чиқаришни маҳаллийлаштиришга ёрдам беришга тайёрмиз. Бозор ва давлат бераётган таклифларни ўрганиб чиқдик. Ўзбекистонда қуёш панелларига қизиқиш катта. Бу ҳақда энергетика вазирлиги мутахассислари билан яқиндан мулоқот қилдик. Менимча, яшил энергия ишлаб чиқариш борасида Ўзбекистон катта салоҳиятга эга. Давлат раҳбарининг ўзи бунга алоҳида эътибор қаратмоқда. Биз бу йўналишдаги ишларни ҳар томонлама қўллаб-қувватлашга тайёрмиз, – дейди “LONGI” компаниясининг Яқин Шарқ ва Марказий Осиё бўйича президенти Жеймс Жин.

 

Кейинги манзилимиз Хитойнинг жаҳонга машҳур “State Grid” компанияси бўлди. Бу компания билан “Ўзбекэнерготаъмир” АЖ юртимизнинг бир қатор ҳудудларида юқори кучланишли электр узатиш тармоқларини қуриш ва модернизация қилиш, янги подстанциялар қуриб фойдаланишга топшириш ишларини ҳамкорликда олиб бориш борасида келишувга эришган.

Бугун Ўзбекистон ва Хитой муносабатлари янги бир босқичга кўтарилди. Ўзбекистон энергетик мустақилликка эришиш йўлида Хитой тажрибасини ва технологияларини жалб этиши муҳим ўрин эгаллайди.

Манба: https://daryo.uz/

«Ўзбекистон МЭТ» АЖ Ахборот хизмати

http://t.me/uzmetaxborotxizmati