Ҳурматли ҳамкасблар, энергетика соҳасининг фидойи ва меҳнаткаш вакиллари!

Қадрли ҳамкорлар!

Хабарингиз бор, 2017 йилнинг 3 январида Давлатимиз раҳбари Шавкат Мирзиёев томонидан Ўзбекистон Республикасининг “Коррупцияга қарши курашиш тўғрисида”ги Қонуни имзоланиб, мамлакатимизда илк бор коррупцияга қарши курашишнинг ҳуқуқий асослари яратилган эди. Кўп ўтмай, Ўзбекистон бу борадаги изчил сиёсий иродасини намоён этиб, БМТнинг Коррупцияга қарши конвенциясига, Иқтисодий ҳамкорлик ва тараққиёт ташкилоти доирасида қабул қилинган коррупсияга қарши кураш бўйича Истанбул ҳаракат режасига қўшилди.

Бу эса, табиийки, коррупцияга ?арши курашишда халқаро ёндашувлардан кенгроқ фойдаланиш имконини берди. Ҳозирги кунда мамлакатимизда Бирлашган Миллатлар Ташкилоти Тараққиёт дастурининг “Ўзбекистонда коррупцияга самарали, ҳисобдор ва ошкора бошқарув институтлари орқали қарши курашиш” лойиҳаси амалга оширилмоқда, коррупциянинг олдини олиш ҳамда унга қарши муросасиз курашишнинг илғор халқаро стандартларга асосланган тизимини жорий этиш бўйича изчил чоралар кўриляпти.

Жумладан, давлат органлари ва ташкилотларининг фаолиятида очиқлик, ошкоралик ҳамда шаффофликни таъминлаш, мансабдор шахсларнинг аҳоли олдидаги ҳисобдорлигини йўлга қўйиш орқали давлат бошқарувида самарали ва таъсирчан жамоатчилик назоратини амалга ошириш учун зарур шароитлар яратилди.

Давлат ҳокимияти органлари ҳамда йирик хўжалик юритувчи субъектларда коррупцияга қарши ички назорат тузилмалари фаолияти йўлга қўйилмоқда.

Бугун биз Энергетика вазирлиги мазкур лойиҳани амалга ошираётган ташкилотлар қаторида эканлигини баралла айта оламиз. Биз жамоамиз билан зиммамизга юкланган масулиятни яхши англаймиз ва ўз навбатида, коррупсияга қарши самарали курашиш учун бор кучимизни ишга соламиз.

Энергетика вазирлиги коррупсияга оид ҳуқуқбузарликларнинг ҳар қандай шакл ҳамда кўринишларини рад этади. Жамиятда коррупцияга нисбатан кескин муросасизлик шаклланишини таъминлашга астойдил ҳисса қўшади. Биз коррупцияга қарши курашишга қаратилган ички меъёрий ҳужжатлар ва тартиб-қоидаларни, жумладан, коррупцияга қарши курашиш режаси, Одоб-ахлоқ қоидалари, коррупцияга қарши ҳамда манфаатлар тўқнашувини бошқариш сиёсати бўйича, шунингдек, бошқа бир қатор меъёрий ҳужжатларни қабул қилдик. Вазирликда коррупсияга қарши курашиш хизмати ташкил этилди.

Коррупсияга қарши курашиш хизматининг асосий вазифаси вазирлик ва унинг тизимидаги ташкилотларда коррупцияга оид ҳуқуқбузарликларнинг юзага келиши сабаблари ҳамда шарт-шароитларини аниқлаш, уларни бартараф қилишнинг таъсирчан тизимини ишлаб чиқиш, ишчи-ходимлар ўртасида тушунтириш ишларини олиб бориш, коррупция хавфи мавжуд бўлган ҳолларда маслаҳат бериш ва қўллаб-қувватлашдан иборат.

Очиғини айтиш керак, энергетика тизимида коррупцияга қарши кучли тизимни яратиш – мураккаб жараён. Бироқ бу тизим барчамиз учун муҳим ва зарурдир. Ҳар биримиз бу ишда нафақат мамлакатимизда қабул қилинган қонунчилик ҳужжатларига онгли равишда риоя этишимиз, балки унга инсонийлик бурчимиз ҳамда виждон амри сифатида қарашимиз керак.

Биз коррупцияга қарши курашни ўзимиз, фарзандларимиз ва жамиятимиз ривожи учун амалга оширамиз. Зеро, бундай салбий ҳолатларга муросасизлик, бундай вазиятларга кўз юммаслик, ҳалол, очиқ ва шаффоф ишлаш орқали юксак тараққий этган, қонун устуворлиги таъминланган мамлакатда яшаймиз!

Энергетика вазирлиги коррупцияга қарши талаблар ҳамда ахлоқий меъёрларга асосланган вазифалар ва бошқарув қарорларининг тўғри бажарилишини кафолатлайди.

Фурсатдан фойдаланиб, ҳамкасбларимиз, ҳамкорларимиз ва юртдошларимизни иш юритиш стандартларига, коррупцияга қарши тамойилларга оғишмай риоя қилишга, ҳар қандай эҳтимолий қонунбузарликлар ҳақида хабар беришга ва агар шубҳа туғилса, саволлар билан мурожаат этишга яна бир бор чорлаб қоламиз.

Давлат фуқаролик хизматчилари одоб-ахлоқининг намунавий қоидаларида давлат хизматчилари ўз касбий фаолиятини қонунийлик, Ватанга садоқат ҳамда хизмат вазифасига фидойилик, юкланган функционал вазифаларини тўлиқ бажариш, ижро интизомига қатъий риоя қилиш, фуқаролар ҳуқуқлари, эркинликлари ва қонуний манфаатларининг устуворлиги, давлат ҳамда жамият манфаатларига содиқлик, адолатлилик, ҳалоллик ва холислик, коррупциявий ҳолатларга муросасиз муносабатда бўлиш, хизмат сирини қатъий сақлаш, мансаб ваколатларини суиистеъмол қилмаслик, манфаатлар тўқнашувига йўл қўймаслик принсипларига риоя этиши шарт эканлиги кўрсатиб ўтилган. Келинг, барчамиз бу принципларни кундалик иш фаолиятимизнинг бош мезони қилиб олайлик!

Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сон Фармони ижросини таъминлаш ҳамда вазирлик тизимида коррупцияга қарши ички назорат тизимини жорий этишнинг устувор вазифаларини ўз вақтида, тўлиқ ҳамда сифатли амалга ошириш мақсадида Коррупцияга қарши курашиш агентлиги томонидан тавсия қилинган, вазирликда коррупцияга қарши ички назорат тизимини жорий этувчи ички идоравий ҳужжатлар ишлаб чиқилиб, қабул қилинган.

Энергетика вазирлиги жамоаси коррупцияга қарши талаблар ва ахлоқий меъёрларни ҳисобга олган ҳолда, ўз зиммасига олган мажбуриятларни виждонан бажаради. Қонун ҳужжатларига қатъий риоя этади. Тенг рақобат тамойилларига амал қилади. Ҳалоллик, очиқлик ва виждонлиликнинг корпоратив маданиятини шакллантиришга алоҳида эътибор қаратади.

Коррупцияга қарши курашиш барчамизнинг умумий ишимиз ва маслагимизга айланмоғи даркор. Бу ишда барчангизни ҳамжиҳатликка чақираман!

Жўрабек МИРЗАМАҲМУДОВ,

Ўзбекистон Республикаси Энергетика вазири.

Манба: https://minenergy.uz/uz/news/view/3014

«Ўзбекистон МЭТ» АЖ Ахборот хизмати

http://t.me/uzmetaxborotxizmati