Кеча, 25 декабрь куни электр станциялар орқали 232,6 млн кВт соат электр энергияси ишлаб чиқарилди. Шундан республика истеъмолчиларига 223,1 млн кВт соат электр энергияси етказиб берилди.

Шунингдек, газ таъминоти корхоналари томонидан истеъмолчиларга 154,3 млн куб метр табиий газ ва 0,1 минг тонна суюлтирилган газ етказиб берилди. Истеъмолчиларни кўмир маҳсулотлари билан таъминлаш мақсадида 5,7 минг тонна маҳаллий кўмир етказиб берилди.

Корхоналарда қазиб чиқариш ва ишлаб чиқариш ишлари ўрнатилган тартибда олиб борилмоқда. Барча корхоналарда штаблар тузилган, 24 соатлик навбатчилик ташкил қилинган.

Республикамизнинг айрим ҳудудларида электр энергияси таъминотида чекловлар (бир ярим соатдан икки соатгача) киритилди.

Соат 20:50 да Андижон шаҳар 2-кичик даҳада жойлашган 155-сонли трансформатор пунктида носозлик кузатилган. Бунинг натижасида, 6 та кўп қаватли уйларда яшовчи 380 га яқин аҳоли электр таъминотидан узилган. Ушбу носозлик соат 01:11да бартараф этилиб, электр таъминоти тўлиқ тикланди.

Таъминотдаги узилишлар бўйича истеъмолчилардан 220 та мурожаат келиб тушди. Мурожаатлар юзасидан электр қурилмаларида юзага келган носозликлар махсус бригадалар томонидан бартараф этилди.

Шунингдек, газ қувурларида босимнинг меъёрдан пастлиги сабабли Тошкент вилоятининг Бўстонлиқ, Пискент, Янгийўл, Зангиота, Бўка ва Чиноз туманларининг айрим хонадонларида газ етиб боришида узилишлар кузатилган. Қолган барча ҳудудларда газ таъминоти барқарорлашган.

Истеъмолчилардан 207 та мурожаат келиб тушди. Мавжуд муаммони бартараф этиш бўйича тезкор чора-тадбирлар олиб борилди.

Газ тармоқларида олиб борилган таъмирлаш ишлари истеъмолчиларни олдиндан огоҳлантирган ҳолда амалга оширилди. Шунингдек, вазирлик ва тизим ташкилотларининг масъул ходимлари ҳудудларга сафарбар этилиб, истеъмолчиларни барқарор энергия ресурслари билан таминлаш чоралари кўрилмоқда.

Бундан ташқари, куз-қиш даврини беталафот ўтказиш мақсадида электр тармоқлари корхоналарида 532 та, газ таъминоти корхоналарида эса 244 та носозликларни олдини олиш ва бартараф этиш бўйича бригадалар ташкил этилган.

Шу ўринда истеъмолчилардан иситиш мосламаларига эҳтиёткорлик билан муносабатда бўлишларини, газ ускуналаридан фойдаланишда хавфсизлик қоидаларига, шунингдек, ис газидан заҳарланишнинг олдини олиш юзасидан берилган тавсияларга қатъий риоя қилишларини сўраймиз.

Ҳурматли истеъмолчилар, электр энергияси таъминоти юзасидан 1154 қисқа рақами ёки Телеграмдаги (@HET_admin) администраторга, шунингдек, табиий ва суюлтирилган газ таъминоти юзасидан 1104, 104 телефонлари ёки (Facebook) ижтимоий тармоғидаги гуруҳга мурожаат қилишингиз мумкин.

▶️@minenergy_uz

Манба: https://t.me/minenergy_uz/6834

«Ўзбекистон МЭТ» АЖ Ахборот хизмати

http://t.me/uzmetaxborotxizmati