Бу ҳақда АОКАда ўтказилган брифингда Энергетика вазирлиги ахборот хизмати раҳбари Ҳасан Тошхўжаев маълум қилди.

Кеча, 28 февраль куни истеъмолчиларни энергия ресурслари билан барқарор таъминлаш бўйича амалга оширилган ишлар ҳақида маълумот берамиз.

28 февраль куни электр станциялар орқали 240,9 млн кВт·соат, режадагига нисбатан 3 фоиз кўп электр энергияси ишлаб чиқарилди. Бунинг учун иссиқлик электр станцияларида 43,3 млн кубометр табиий газ, 17,2 минг тонна кўмир ҳамда 11,9 минг тонна мазут ёқилди.

Туркманистон Республикасидан 22,3 млн кВт·соат электр энергияси импорт қилинди.

Республика истеъмолчиларига 231,6 млн кВт·соат, режадагига нисбатан 2 фоиз кўп электр энергияси етказиб берилди.

Қишнинг совуқ кунларида магистраль газ қувурларида газ босимининг кескин тушиб кетганлиги ҳамда аҳоли истеъмолчиларида электр энергиясига нисбатан талабнинг ошиб бориши туфайли 28 февраль куни ҳам мамлакатимиз бўйлаб асосан куннинг тиғиз вақтларида чекловлар киритилишига мажбур бўлинди. Кеча жорий йилдаги максимал миқдор – 800 МВтгача чекловлар киритилди.

Мавжуд вазиятдан келиб чиқиб, ҳолат яхши томонга ўзгаргунга қадар бугун ҳам куннинг тиғиз пайтларида маълум миқдорда чекловлар киритилиши мумкин.

Газ босимининг одатдагидан кўра паст эканига қарамай, 28 февраль куни ҳам унинг истеъмоли юқорилигича қолди. Кеча мазкур миқдор 152,4 млн кубометрни ташкил қилди.

Табиий газ босими аста-секинлик билан кўтарилиб келяпти. Бироқ бу ҳозирча меъёрий схеманинг тўлиқ тикланишига камлик қилмоқда.

Жорий йилнинг 17 февраль куни Бухоро вилоятида кучли шамол ва муз аралаш ёққан қор туфайли содир бўлган авариядан сўнг магистраль газ қувурларида газ босими кескин тушиб кетганининг оқибатларини бартараф этиш, республика истеъмолчилари ҳамда иссиқлик электр станцияларини табиий газ билан бир маромда таъминлашда юзага келиши мумкин бўлган салбий ҳолатларнинг олдини олиш мақсадида қатор зарур чоралар кўрилмоқда.

Хусусан, аҳоли ва ижтимоий соҳа объектларини биринчи навбатда табиий газ билан таъминлаш ҳамда қувурлардаги босимни бир меъёрда тутиб туриш мақсадида барча ҳудудлардаги автомобилларга газ тўлдириш компрессор шохобчаларнинг иш фаолияти маҳаллий ҳокимликлар томонидан тасдиқланган режа-график асосида тизимли равишда йўлга қўйилмоқда.

Кеча мамлакатимиздаги 542 та ана шундай шохобча орқали аҳолига ва ижтимоий соҳалар объектларига тегишли автомобиллар, шунингдек, жамоат транспортларининг барча турларига 3 миллион 725 минг кубометр табиий газ сотилди. Шунингдек, автомобилларга газ қуйиш станциялари орқали жами 1 минг 30 тонна суюлтирилган газ етказилди.

Аҳоли ва иқтисодиёт тармоқлари автобензин ҳамда дизель ёнилғиси билан мавжуд эҳтиёжни тўлиқ қоплайдиган даражада таъминланмоқда. Хусусан, 28 февраль куни “Ўзбекнефтгаз” акциядорлик жамияти томонидан юртимиздаги барча автомобилларга ёнилғи қуйиш шохобчаларига 4 минг 489 тонна автобензин етказиб берилди.

Шунингдек, биржа савдоларига автомобилларга ёқилғи қуйиш шохобчаларида сотиш учун 9 минг 510 тонна автобензин, 1 минг 546 тонна дизель ёнилғиси қўйилган бўлиб, ундан 4 минг 617 тонна автобензин, 845 тонна дизель ёнилғиси сотилди.

Вазирлик тизимидаги ташкилотлар корхоналарида қазиб чиқариш ва ишлаб чиқариш ишлари ўрнатилган тартибда олиб борилмоқда. Барча корхоналарда тузилган штаблар 24 соатлик навбатчилик режими асосида ишлаяпти.

Республика ҳудудлари бўйлаб қишнинг совуқ кунларида истеъмолнинг кўпайиши туфайли электр тармоқлари ҳамда трансформатор пунктларида юкламаларнинг ортиши ҳисобига юзага келаётган носозликлар ҳам тезкор бартараф этиб борилмоқда.

Кеча мамлакатимиз бўйлаб электр қурилмаларида юзага келган 14 та, газ таъминотида юзага келган 5 та носозлик бартараф қилинди.

Жумладан, кеча соат 8 дан 30 дақиқа ўтганида Сурхондарё вилоятида 35 кВ кучланишдаги “Л-Денов” электр узатиш тармоғида носозлик юзага келган. Бунинг оқибатида Денов ва Шўрчи туманларидаги 2 минг 500 та абонент электр таъминотидан узилган. Соат 16 дан 23 дақиқа ўтганида носозлик бартараф этилиб, истеъмолчиларнинг таъминоти қайта тикланган.

Соат 11 дан 10 дақиқа ўтганида Хоразм вилоятининг Қўшкўпир туманини газ билан таъминловчи Д-159 ммли ер усти юқори босимли газ қувурида таъмирлаш ишларини бажариш мақсадида 6 минг 917 та аҳоли хонадони ва 154 та улгуржи истеъмолчининг газ таъминоти вақтинча тўхтатилди. Соат 18 дан 20 дақиқа ўтганида таъмирлаш ишлари якунланиб, истеъмолчилар олдиндан огоҳлантирилган тарзда босқичма-босқич газ таъминотига қайта уланди.

Қайд этиш жоизки, қиш кунларида тармоқларда юзага келиши мумкин бўлган носозликларни бартараф қилиш мақсадида электр ва газ таъминоти корхоналарида тузилган махсус бригадаларнинг 7 минг 300 нафардан ортиқ ишчи-ходимлари туну кун ишлаб, жойларда муаммоларни зудлик билан бартараф этмоқдалар.

28 февраль куни электр таъминотидаги узилишлар юзасидан Энергетика вазирлиги тизим ташкилотларига истеъмолчилардан 899 та мурожаат келиб тушди ва барчаси махсус бригадалар томонидан бартараф этилди.

Табиий ҳамда суюлтирилган газ таъминоти бўйича келиб тушган 291 та мурожаат бўйича ҳам тегишли тартибда тезкор чора-тадбирлар кўрилди.

Шу ўринда истеъмолчилардан табиий газ ва электр энергиясидан тежаб-тергаб фойдаланишларини, заруратсиз ишлаётган ортиқча қувватларни ўчириб юришларини илтимос қиламиз. Чунки айни шу тежамкорлик орқали куннинг тиғиз вақтларида киритилаётган чекловларни яхшигина камайтиришимиз мумкин.

Қолаверса, иситиш мосламаларига эҳтиёткорлик билан муносабатда бўлишларини, газ ускуналаридан фойдаланишда хавфсизлик қоидаларига, шунингдек, ис газидан заҳарланишнинг олдини олиш юзасидан берилаётган тавсияларга қатъий риоя этишларини сўраймиз.

Ҳурматли истеъмолчилар! Агар Сиз электр энергияси ва газ таъминоти бўйича қандайдир муаммога дуч келсангиз, электр энергияси таъминоти юзасидан 1154 қисқа рақамига, шунингдек, 71-207-23-76 телефон рақами ёки “Телеграм”даги @het_admin администраторга, газ таъминоти юзасидан 1104, 104 қисқа рақамларига, шунингдек, 71-202-11-04 телефон рақами ёки “Фейсбук” ижтимоий тармоғидаги махсус гуруҳга ҳамда кўмир таъминоти юзасидан 78-148-30-03, 71-244-38-28 телефон рақамларига мурожаат қилишингиз мумкин.

Манба: https://t.me/Rasmiy_xabarlar_Official/42422

«Ўзбекистон МЭТ» АЖ Ахборот хизмати

http://t.me/uzmetaxborotxizmati