Янгиликлар
«Ўзбекистон МЭТ» АЖда касаба уюшма ташкилотларининг видео-конференцияси бўлиб ўтди
  • 20.03.2020
  • 89

  Хабарингиз бор, Президент Шавкат Мирзиёев 2020 йил 18 март куни коронавирус билан боғлиқ вазият бўйича Ўзбекистон халқига мурожаат қилди. Бундан олдинроқ, Президент топшириғига биноан,  Ўзбекистон Бош вазири Абдулла Арипов коронавирус инфекциясининг аҳоли ўртасида кенг тарқалиб кетишининг олдини олиш чора-тадбирларини кучайтириш мақсадида шошилинч йиғилиш ўтказган эди. Йиғилишда барча давлат ва нодавлат ташкилотлари томонидан мажлис ҳамда бошқа тадбирлар ўтказиш вақтинчалик тўхтатилиши ҳақида кўрсатма берилганди.

  Шу боис, «Ўзбекистон миллий электр тармоқлари» акциядорлик жамияти бошқарув раиси Д.А.Исақуловнинг топшириғига биноан мажлислар сони ва унда иштирок этувчилар сони кескин қисқартирилиб, филиал ва таркибий тузилмалардаги раҳбар кадрлар билан иш жараёни масофадан туриб — видеомулоқот тарзида ўтказилмоқда.

  Кеча, 2020 йил 19 март куни «Ўзбекистон миллий электр тармоқлари» акциядорлик жамияти раҳбарияти ва касаба уюшма ташкилотларининг видео-конференцияси бўлиб ўтди. Видео-конференция кун тартибида 4 та масала кўриб чиқилди:

  1. «Ўзбекистон миллий электр тармоқлари» АЖ ҳамда Бирлашган касаба уюшма қўмитаси ўртасида тузилган 2019-2021 йилларга мўлжалланган Жамоа шартномасининг 2019 йилда бажарилиш натижалари;
  2. Жамоа шартномасига қўшимча ва ўзгартиришлар киритиш;
  3.  «Ўзбекистон миллий электр тармоқлари» АЖ Бирлашган касаба уюшма қўмитасининг 2019 йил сентябрдан 2020 йил март ойигача олиб борган фаолиятининг ахбороти;
  4. Ўзбекистон энергетика ходимлари касаба уюшмаси Республика Кенгашининг ҳисобот-сайлов Қурултойига делегатлар сайлаш.     

  Видео-конференцияда иш берувчи томонидан «Ўзбекистон МЭТ» АЖ бошқарув раисининг биринчи ўринбосарлари Х.Б.Элмуродов ҳамда С.С.Артиковлар иштирок этишди.

  «Ўзбекистон миллий электр тармоқлари» АЖ бирлашган касаба уюшма қўмитасининг 2020 йил 6 январдаги 33-сонли “Ҳисобот йиғилишларини ўтказиш ҳақида”ги қарорига асосан жорий йил февраль ойида Жамият тасарруфидаги барча филиаллар ва таркибий бўлинмаларда ҳисобот йиғилишлари ўтказилиб, «Ўзбекистон миллий электр тармоқлари» АЖ Бирлашган касаба уюшма қўмитасининг конференциясига вакиллик меъёрларига асосан 44 нафар делегатлар сайланган эди.

  Видео-конференцияда 44 нафар сайланган делегатлардан 42 нафари иштирок этди. 2 нафари узрли сабабларга кўра иштирок этишмади.       

  Видео-конференцияга «Ўзбекистон МЭТ» АЖ бошқарув раисининг биринчи ўринбосарлари Х.Элмуродов раислик қилди.

  Видео-конференция кун тартибига қўйилган барча масалалар кўриб чиқилди:   

  1. «Ўзбекистон миллий электр тармоқлари» АЖ ҳамда Бирлашган касаба уюшма қўмитаси ўртасида тузилган 2019-2021 йилларга мўлжалланган Жамоа шартномасининг 2019 йилда бажарилишини текшириб борувчи комиссиянинг далолатномаси ўқиб эшиттирилди. Акциядорлик жамияти Жамоа шартномасининг 2019 йилда бажарилиши қониқарли деб топилди;
  2. «Ўзбекистон миллий электр тармоқлари» АЖ ҳамда Ўзбекистон энергетика ходимлари касаба уюшмаси Республика кенгашининг 2020 йил 18 мартдаги “Тармоқ (Тариф) Келишувига ўзгартириш киритиш тўғрисида”ги 90/19-23“с”-сонли буйруқ-қарорига асосан Жамоа шартномасига  ўзгартиришлар киритилди;
  3. Бирлашган касаба уюшма қўмитаси раиси Н.Ж.Хидирова «Ўзбекистон миллий электр тармоқлари» АЖ Бирлашган касаба уюшма қўмитасининг 2019 йил сентябрдан 2020 йил март ойигача олиб борган фаолияти ҳақида ахборот берди;
  4. Ўзбекистон энергетика ходимлари касаба уюшмаси Республика Кенгашининг ҳисобот-сайлов Қурултойига вакиллик меёрларига асосан 6 нафар делегатлар сайланди.

  Эфирда иштирок этган барча делегатлар кўрилган масалаларга ўз фикрларини билдиришди. Жамоа шартномасига киритилган ўзгартиришларга рози ёки қарши эканлари ҳақида овозга қўйилди ва барча делегатлар бир овоздан рози эканликларини айтишди.

«Ўзбекистон МЭТ» АЖ Ахборот хизмати

Каналга аъзо бўлинг! t.me/uzmetaxborotxizmati

Диққат! Веб-сайт тест ҳолатида ишламоқда.