Бугун мамлакат энергетика тизими янги вазифага дуч келмоқда: электр энергияси истеъмолининг ўсиши баъзан тармоқнинг ортиқча юкланишига олиб келади ва шу сабабли, айниқса юклама энг юқори бўлган пайтларда, чироқ ўчиб қолиши ҳолатлари юз беради.

Ушбу муаммони ҳал қилиш ва энергия таъминотини янада барқарор қилиш учун Зангиотада (Тошкент вилояти) қуввати 150 МВт бўлган энергия сақлаш тизими қурилмоқда.

Бу технология катта аккумулятор тизими каби ишлайди: у юклама паст бўлган даврларда ортиқча ишлаб чиқарилган электр энергиясини сақлаб қолади ва юклама энг юқори бўладиган пайтда уни қайта тармоққа беради. Электр тармоғидаги юклама мувозанатлашади, электр таъминотидаги кутилмаган узилишлар хавфи камаяди ва истеъмолчилар уйда, мактабларда ҳамда корхоналарда барқарор ёруғликка эга бўлади.

Энергия сақлаш тизими, шунингдек, қуёш ва шамол электр станциялари каби қайта тикланувчи манбаларни тармоққа барқарор улашга ёрдам беради. Чунки бундай манбалар орқали энергия ишлаб чиқариш ҳар доим ҳам барқарор бўлмаслиги мумкин, мазкур тизим эса тебранишларни юмшатиб, узлуксиз электр таъминотини таъминлайди.

Лойиҳа доирасида электр узатиш линиялари, подстанция ва замонавий бошқарув ҳамда мониторинг технологияларига асосланган энергия сақлаш тизимининг ўзи қурилмоқда. Буларнинг барчаси халқаро лойиҳалаш ва қурилиш стандартларига мувофиқ амалга оширилмоқда, бу эса инфратузилманинг хавфсизлиги ва ишончлилигини кафолатлайди.

Натижада минтақа аҳолиси янада барқарор энергия тармоғига, камроқ узилишларга, «яшил» энергияни қўллаб-қувватлашга ва замонавий энергетика инфратузилмаси ривожига эга бўлади. 

Манба:  https://t.me/clearenergy/2941

«Ўзбекистон МЭТ» АЖ Ахборот хизмати 

http://t.me/uzmetaxborotxizmati