Бугун “Ўзбекистон миллий электр тармоқлари” акциядорлик жамияти бошқаруви раиси Дадажон Исақулов ва Хитойнинг “Shanghai Electric Group Co., Ltd” компанияси раиси Ву Лей бошчилигидаги делегация ўртасида энергетика соҳасидаги ҳамкорлик истиқболларига бағишланган муҳим учрашув бўлиб ўтди.

Учрашувда икки томонлама ҳамкорликни янада кенгайтириш, электр энергетикаси инфратузилмасини модернизация қилиш ва инновацион ечимларни жорий этиш масалалари муҳокама қилинди. 

Суҳбат чоғида Ўзбекистонда амалга оширилаётган энергетика ислоҳотлари, тармоқда бозор механизмларининг жорий этилаётгани ҳамда электр таъминоти барқарорлигини таъминлаш бўйича давлат сиёсатининг устувор йўналишлари ҳақида маълумот берилди. 

Шундан сўнг томонлар электр энергиясини узатиш тармоқларини модернизация қилиш, юқори кучланишли подстанцияларни замонавий ускуналар билан жиҳозлаш, диспетчерлик бошқарувини рақамлаштириш ва ақлли тармоқлар тизимини босқичма-босқич жорий этиш борасида фикр алмашди. Шунингдек, қуёш ва шамол энергиясига асосланган қайта тикланувчи энергия манбаларини ривожлантириш бўйича қўшма лойиҳаларни амалга ошириш имкониятлари муҳокама этилди.

“Shanghai Electric Group Co., Ltd” компанияси вакиллари Ўзбекистон энергетика бозорининг инвестициявий салоҳияти юқори эканини қайд этиб, қўшма ишлаб чиқаришни ташкил этиш, маҳаллийлаштириш даражасини ошириш ва узоқ муддатли ҳамкорлик муносабатларини йўлга қўйишга тайёр эканликларини маълум қилди. Шу билан бирга, компания томонидан юқори самарадорликка эга энергетик ускуналар, замонавий саноатечимлари ва рақамли бошқарув платформалари билан боғлиқ таклифлар илгари сурилди.

Жамият ахборот хизматига кўра, учрашув якунида амалий ҳамкорликни йўлга қўйиш юзасидан ишчи тартибдаги келишувга эришилди. 

Н.Зиёдуллаева, ЎзА

Манба: https://uza.uz/