Tashqi ishlar vaziri o‘rinbosari Sherzod Asadov Prezident Administratsiyasi rahbari o‘rinbosari - prezidentning matbuot kotibi etib tayinlandi. Bu haqdagi ma'lumotni Kun.uz manbasi tasdiqladi.

Prezident Shavkat Mirziyoyev bugungi videoselektorda Sherzod Asadovni Prezident Administratsiyasi rahbari o‘rinbosari - prezidentning matbuot kotibi sifatida tanishtirgan. Davlat rahbari Sherzod Asadov turli lavozimlarda o‘zini ko‘rsatgani, xorijda ham ishlab kelganini ta'kidlab o‘tgan.

«Ko‘p o‘ylab shu qarorga keldim. Bugun Sherzod Asadovni prezidentning matbuot kotibi etib tayinlash to‘g‘risidagi farmonni imzoladim. Tilni biladi, dunyoni ko‘rgan. U ham katta kurash maydoniga kiryapti. Shu fursatdan foydalanib aytmoqchiman, Sherzod Asadov davlat siyosatining yoritilishiga mas'ul bo‘ladi.

Unga juda mas'uliyatli vazifa topshirilyapti. Barcha idoralarning matbuot kotiblarini o‘qitish, malakasini oshirish kerak. Solishtirish, xolisona yondashuvni o‘rgatish kerak. Har bir vazirlik matbuot xizmatlari Asadovga bo‘ysunadi va hisobot beradi. U barcha idoralar, hokimliklar matbuot kotiblari faoliyatini muvofiqlashtirib boradi.

Avvalgi davr bilan solishtirish kerak, hozirgi adolatli siyosatni xalqqa yetkazish kerak. Dunyoda axborot olamida keskin kurashlar ketyapti. Buni to‘g‘ri anglab yetish kerak», degan davlat rahbari.

Ma'lumot uchun, Sherzod Asadov 2015-2017-yillarda tashqi ishlar vaziri Abdulaziz Komilovga yordamchi bo‘lgan, 2017-yildan O‘zbekistonning Avstriyadagi elchixonasida ish boshlagan, 2018-yildan O‘zbekistonning Avstriyadagi favqulodda va muxtor elchisiga aylangandi.

Sherzod Asadov 2020-yil martida O‘zbekiston tashqi ishlar vaziri o‘rinbosari lavozimiga tayinlangandi.

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham bu yangilikka munosabat bildirdi.

«Sherzod Asadovni tajribali, xalqaro tashkilotlar talablarini yaxshi tushunadigan yetuk kadrlardan biri deb hisoblayman. O‘z vaqtida uning bevosita yordamida biz YeXHT va Yevropaning ko‘plab mamlakatlarining so‘z erkinligi bilan bog‘liq tashkilotlari bilan yaqin hamkorlikni yo‘lga qo‘yib, ko‘plab loyihalarni amalga oshirgan edik.

O‘ylaymanki ushbu tayinlov faqat yaxshilikka xizmat qiladi. Yuqorida so‘z erkinligi va ochiqlikning davlat va jamiyat, shuningdek, xalqaro miqyosdagi rolini tushunadigan yana bitta saviyali odam paydo bo‘ldi va bu bilan barcha matbuot xodimlarini samimiy tabriklayman. Bizning safimiz yana bitta odamga ko‘paydi. Sherzod Asadovni oson bo‘lmagan, mas'uliyatli va sharafli vazifa bilan qutlab, unga omad tilab qolaman», deya yozgan u telegramdagi kanalida.

Eslatib o‘tamiz, hozirda Axborot va ommaviy kommunikatsiyalar agentligiga direktori bo‘lgan Asad Xo‘jayev 2017-yil martidan avgustgacha prezident Shavkat Mirziyoyevning matbuot xizmati rahbari bo‘lgan. Keyinroq bu lavozimda Komil Allamjonov qariyb bir yil davomida - 2017-yil dekabridan 2018-yil oktyabrigacha ishlagan.

2020 yil yozidan buyon prezident matbuot kotibi vazifalarini prezident administratsiyasi rahbarining OAV masalalari bo‘yicha o‘rinbosari Dilnoza Ziyamuhamedova bajarib kelayotgandi.

https://kun.uz/uz/71880267

"O'zbekiston MET" AJ axborot xizmati

 t.me/uzmetaxborotxizmati