Eʼtiboringizga «O‘zbekiston milliy elektr tarmoqlari» aksiyadorlik jamiyati tomonidan yuqori kuchlanishli podstansiya hamda magistral elektr tarmoqlarida ayni kunlarda olib borilayotgan mukammal va joriy taʼmirlash ishlari yuzasidan maʼlumotlar taqdim etamiz.

Avvalo, shuni alohida taʼkidlash lozimki, magistral elektr uzatish havo tarmoqlari, podstansiyalardagi kuch transformatorlari yuklamalari, qurilmalarning texnik holati muntazam tekshirib boriladi.

Yuqori kuchlanishli elektr qurilmalarining ishonchli ishlashini taʼminlash maqsadida, 2024-yil uchun tasdiqlangan rejaga asosan, joriy yil yanvar-oktyabr oylarida 848,3 km uzunlikdagi 110–220–500 kV kuchlanishli elektr uzatish havo tarmoqlari, 9 dona podstansiya transformatorlari, 31 dona o‘chirgich va 4 dona kompressor qurilmalari mukammal taʼmirlanadi.

Shu bilan birga, joriy yilda 5451,088 km uzunlikdagi 110–220–500 kV kuchlanishli elektr uzatish tarmoqlari, 304 dona podstansiya transformatori, 1643 dona o‘chirgich, 12 dona kompressor qurilmalari joriy taʼmirlanadi. 

Jumladan, may oyida 14,5 km uzunlikdagi 110–220–500 kV kuchlanishli elektr tarmoqlari, 1 dona podstansiya transformatori, 4 dona o‘chirgich, 1 dona kompressor qurilmasida mukammal taʼmirlash ishlari bajarildi.

Joriy yil may oyida 125 km uzunlikdagi 110–220–500 kV kuchlanishli liniyalar, 24 dona podstansiya transformatori, 98 dona o‘chirgichlar joriy taʼmirlash ishlari bajarilmoqda.

Agar joriy yil boshidan amalga oshirilgan ishlarni sarhisob qilsak, yanvar-may oyida 384,196 km uzunlikdagi 110–220–500 kV kuchlanishli elektr uzatish havo tarmoqlari, 2 dona podstansiya transformatori, 15 dona o‘chirgichlar, 4 dona kompressor qurilmasi mukammal taʼmirlandi.

Bundan tashqari, joriy yilning yanvar-may oylarida 2037,3 km uzunlikdagi 110–220–500 kV kuchlanishli elektr uzatish havo tarmoqlari, 147 dona podstansiya transformatori, 710 dona o‘chirgich, 7 dona kompressor qurilmalarida joriy taʼmirlash ishlari bajarildi va rejaga muvofiq davom ettirilmoqda.

Shuningdek, “Magistral elektr tarmoq podstansiyalarini zamonaviylashtirish va rekonstruksiya qilish” investitsiya loyihasiga asosan 220 hamda 500 kV kuchlanishli yuqori kuchlanishli podstansiyalarning o‘rnatilgan quvvatlari oshirib borilmoqda.

Misol uchun, navbatdagi modernizatsiya-rekonstruksiya, qurilish-montaj ishlari Andijon viloyatida joylashgan 500 kV kuchlanishli “Lochin” podstansiyasida olib borildi.

500/220/10 kV “Lochin” podstansiyasining quvvatini oshirish hamda aholini ishonchli elektr energiyasi bilan taʼminlash maqsadida mavjud AT-2 3x167 MVAli avtotransformatorlar o‘rniga 3x267 MVA quvvatli yangi avtotransformatorlar ishga tushirildi. Buning natijasida podstansiyada qo‘shimcha 300 MVA quvvat yaratildi. Hozirda podstansiyaning umumiy o‘rnatilgan quvvati 1302 MVA yetkazildi.

Eslatib o‘tamiz, 2024-yilning yakuniga qadar AT-1 3x67 MVAli avtotransformatorlar o‘rniga 3x267 MVA quvvatli yangi avtotransformatorlar ishga tushirilishi rejalashtirilgan. Buning natijasida podstansiyada qo‘shimcha 300 MVA quvvat yaratiladi. Ishlar yakunlangandan so‘ng podstansiyaning umumiy quvvati 1602 MVA ga yetkaziladi.

Hurmatli isteʼmolchilar, «O‘zbekiston milliy elektr tarmoqlari» aksiyadorlik jamiyati tomonidan yuqori kuchlanishli podstansiya hamda magistral elektr tarmoqlari barqaror faoliyati uchun barcha kuch va resurslar safarbar etilgan.

Mamlakatimizda isteʼmol hajmi sezilarli darajada oshishi kutilayotgan yoz mavsumi, bundan tashqari, 2024/2025-yil kuz-qish mavsumiga tayyorgarlik ishlari rejaga muvofiq amalga oshirilmoqda.

Batafsil maʼlumotlar bilan «O‘zbekiston milliy elektr tarmoqlari» aksiyadorlik jamiyatining rasmiy uzbekistonmet.uz veb-sayti orqali tanishishingiz mumkin.

Eʼtiboringiz uchun rahmat!

Ulug‘bek Urunov, «O‘zbekiston milliy elektr tarmoqlari» aksiyadorlik jamiyati boshqaruv raisining matbuot kotibi — axborot siyosati masalalari bo‘yicha maslahatchisi

«O‘zbekiston MET» AJ Axborot xizmati

http://t.me/uzmetaxborotxizmati