Joriy yilning 16-18-avgust kunlari Qashqadaryo viloyati Shahrisabz shahridagi “Lochin” bolalar dam olish oromgohida “O‘zbekiston ayoli – sog‘lom oila va sog‘lom jamiyat timsoli” shiori ostida “Energetika xotin-qizlari xalqaro forumi” o‘tkazildi.

 

 

Forum O‘zbekiston Energetika, neft-gaz va geologiya xodimlari kasaba uyushmasi Respublika Kengashi, “O‘zbekneftgaz” AJ xotin-qizlar qo‘mitasi hamda “Sho‘rtan gaz kimyo majmuasi” MCHJ hamkorligida tashkil etildi.

 

 

Forumda Energetika vazirligi va “O‘zbekneftgaz" AJ tizimidagi korxonalarda faoliyat olib borayotgan 200 nafarga yaqin xotin-qizlar, shuningdek, Qozog‘iston, Tojikiston, Qirg‘iziston va Tatariston mamlakatlarining energetika va neft-gaz sanoati korxonalardagi mavjud kasaba uyushma qo‘mitalarining 10 nafar vakillari ishtirok etdi.

 

 

Forumning asosiy maqsadi yurtimizda va hamdo‘st davlatlarning energetika va neft-gaz sohasida mehnat qilayotgan xotin-qizlarni o‘zaro fikr va tajriba almashishi, ilmiy, ijodiy va intellektual salohiyatini yuksaltirishdan iboratdir.

 

 

 

Dastavval mehmonlarni yurtimizning tarixi va millatimiz qadriyatlari bilan yaqindan tanishtirish maqsadida ko‘hna va boqiy Samarqand hamda so‘lim Shahrisabz shaharlariga sayohat uyushtirildi.

 

 

 

Shundan so‘ng “Lochin” bolalar dam olish oromgohida forum ishtirokchilarini kutib olish marosimi bo‘lib o‘tdi va forumga start berildi. Ochilish marosimida moderatorlar tomonidan forum dasturi va ko‘zda tutilgan tadbirlar haqida ma’lumotlar berildi.

Dasturga muvofiq ishtirokchilarni 10 ta jamoaga bo‘lgan holda yurtimizdagi malakali kouch-trenerlar ko‘magida “Sog‘lom ayol-sog‘lom jamiyat” mavzusida seminar treninglar tashkil etildi.

 

 

 

Qiziqarli va interfaol usullarda o‘tkazilgan seminar-treninglardan so‘ng Sho‘rtan gaz kimyo majmuasining xotin-qizlari tomonidan tayyorlangan “Ajdodlar merosi-go‘zal atlasim!” hunarmandlar ko‘rgazmasi hamda “Zamonlar osha-madaniy meros” milliy folklor namoyishi bo‘lib o‘tdi.

Ishtirokchilarni ilm olishga, kitob o‘qishga, izlanishga bo‘lgan qiziqishlarini qo‘llab-quvvatlash maqsadida “Breyn ring” intellektual shousi bo‘lib o‘tdi.

 

 

 

Qiziqarli va mantiqiy savollarga boy bo‘lgan aql charxi bahsida Sho‘rtan gaz kimyo majmuasi xotin-qizlaridan iborat bo‘lgan 1-jamoa va qo‘shni davlat ishtirokchilardan iborat 10-jamoa g‘oliblikni qo‘lga kiritdi.

Forumning ikkinchi kunida “Xotin-qizlar huquqlari va ularga berilayotgan imtiyozlar, gender tenglik” mavzusida seminar hamda mantiqiy fikrlash va chaqqon harakatlarni talab etuvchi kvest treningi o‘tkazildi.

 

 

 

Kunning ikkinchi qismi sport tadbirlari bilan davom etib, ishtirokchilar quvnoq sport va suv polosi kabi sport turlarida bellashdilar.

Sport musobaqalari yakunlariga ko‘ra “Quvnoq sport” musobaqasida "O‘zbekneftgaz" AJ tarkibidagi korxonalarda faoliyat olib boruvchi xotin-qizlardan iborat 8-jamoa, Suv polosida “Sho‘rtan GKM” MCHJ xotin-qizlaridan iborat 1-jamoa g‘oliblikni qo‘lga kiritdi.

 

 

 

Shundan so‘ng, Qashqadaryo viloyat musiqali drama teatri tomonidan taqdim etilgan “Zamonlar osha – madaniy meros” shou dasturi ishtirokchilarga yanada ko‘tarinki kayfiyat ulashdi.

Forum yakunida tashkil etilgan mushaklar shousi hamda gulxan atrofidagi konsert dasturi ishtirokchilarda katta taassurot qoldirdi.

 

“Sho‘rtan gaz kimyo majmuasi” MCHJ Axborot xizmati

Manba: https://minenergy.uz/uz/news/view/3199

«O‘zbekiston MET» AJ Axborot xizmati

https://t.me/uzmetaxborotxizmati