Kecha, 11-dekabr kuni elektr stansiyalar orqali 227,2 mln kVt-soat elektr energiyasi ishlab chiqarildi. Shundan respublika isteʼmolchilariga 224 mln kVt-soat elektr energiyasi yetkazib berildi.

Shuningdek, gaz taʼminoti korxonalari tomonidan isteʼmolchilarga 156 mln kub metr tabiiy gaz va 1,4 ming tonna suyultirilgan gaz yetkazib berildi. 20,7 ming tonna ko‘mir mahsuloti qazib olindi.

Korxonalarda qazib chiqarish va ishlab chiqarish ishlari o‘rnatilgan tartibda olib borilmoqda. Barcha korxonalarda shtablar tuzilgan, 24 soatlik navbatchilik tashkil qilingan.

Respublikamizning ayrim hududlarida elektr energiyasi taʼminotida cheklovlar (bir yarim soatdan ikki soatgacha) kiritildi.

Kecha, soat 20:18da Toyloq tumani, “Bog‘izag‘on” podstansiyasidagi transformatorda yong‘in yuzaga kelgan. Hozirda ushbu nosozlikni bartaraf etish ishlari olib borilmoqda. Ta’mirlash ishlari yakunlangandan so‘ng elektr ta’minoti qayta tiklanadi.

Taʼminotdagi uzilishlar bo‘yicha isteʼmolchilardan 576 ta murojaat kelib tushdi. Murojaatlar yuzasidan elektr qurilmalarida yuzaga kelgan nosozliklar maxsus brigadalar tomonidan bartaraf etildi.

Shuningdek, gaz quvurlarida bosimning meʼyordan pastligi sababli Toshkent, Farg‘ona, Andijon, Namangan, Jizzax, Samarqand, Surxondaryo viloyatlari va Toshkent shahrining ayrim hududlarida tabiiy gaz yetib borishida uzilishlar kuzatilgan. Xususan:

Toshkent viloyati:  Bo‘stonliq, Piskent, Ohangaron, Parkent, Yangiyo‘l, Zangiota, Toshkent, Bo‘ka, Oqqo‘rg‘on, O‘tra-Chirchiq, Yuqori-Chirchiq, Chinoz tumanlari va Yangiyo‘l shahrining ayrim xonadonlarida;

Farg‘ona viloyati: Beshariq, Buvayda, Dang‘ara, Yozyovon, Oltiariq, Qo‘shtepa, Rishton, So‘x, Uchko‘prik, Farg‘ona, Furqat, O‘zbekiston, Quva tumanlari  va Marg‘ilon, Farg‘ona, Quvasoy, Qo‘qon shaharlarining ayrim xonadonlarida;

Andijon viloyati: Andijon, Asaka, Baliqchi, Bo‘ston, Buloqboshi, Jalaquduq, Izboskan, Marhamat, Oltinko‘l, Paxtaobod, Ulug‘nor, Xo‘jaobod, Shahrixon, Qo‘rg‘ontepa tumanlari va Andijon, Xonobod, Qorasuv shaharlarining ayrim xonadonlarida;

Namangan viloyati: Davlatobod tumani va Namangan shahrining ayrim xonadonlarida;

Jizzax viloyati: Sh.Rashidov va Dashtabod tumanlarining ayrim xonadonlarida;

Samarqand viloyati: Bulung‘ur, Kattaqo‘rg‘on, Ishtixon, Samarqand, Oqdaryo, Jomboy, Narpay, Nurobod, Payariq, Pastdarg‘om, Paxtachi, Toyloq, Urgut tumanlari va Samarqand, Kattaqo‘rg‘on shaharlarining ayrim xonadonlarida;

Surxondaryo viloyati: Termiz shahrining ayrim xonadonlarida;

Toshkent shahar: Yashnabod tumanining ayrim xonadonlarida gaz yetib borishida uzilishlar kuzatilgan.

Isteʼmolchilardan 350 ta murojaat kelib tushdi. Mavjud muammoni bartaraf etish bo‘yicha tezkor chora-tadbirlar olib borildi.

Gaz tarmoqlarida olib borilgan taʼmirlash ishlari isteʼmolchilarni oldindan ogohlantirgan holda amalga oshirildi. Shuningdek, vazirlik va tizim tashkilotlarining masʼul xodimlari hududlarga safarbar etilib, isteʼmolchilarni barqaror energiya resurslari bilan taminlash choralari ko‘rilmoqda.

Bundan tashqari, kuz-qish davrini betalafot o‘tkazish maqsadida elektr tarmoqlari korxonalarida 532 ta, gaz taʼminoti korxonalarida esa 244 ta nosozliklarni oldini olish va bartaraf etish bo‘yicha brigadalar tashkil etilgan.

Shu o‘rinda isteʼmolchilardan isitish moslamalariga ehtiyotkorlik bilan munosabatda bo‘lishlarini, gaz uskunalaridan foydalanishda xavfsizlik qoidalariga, shuningdek, is gazidan zaharlanishning oldini olish yuzasidan berilgan tavsiyalarga qatʼiy rioya qilishlarini so‘raymiz.

Hurmatli isteʼmolchilar, elektr energiyasi taʼminoti yuzasidan 1154 qisqa raqami yoki Telegramdagi (@HET_admin) administratorga, shuningdek, tabiiy va suyultirilgan gaz taʼminoti yuzasidan 1104, 104 telefonlari yoki Facebook  ijtimoiy tarmog‘idagi guruhga murojaat qilishingiz mumkin.

▶️ @minenergy_uz