Bugun 1-iyun — Xalqaro bolalarni himoya qilish kuni.  70 yildan buyon yozning ilk kuni bolajonlarning sevimli bayrami sifatida keng nishonlanadi.

Keling, ushbu sana tarixiga nazar solaylik...

  1949-yilda Parijda ayollarning Xalqaro demokratik federatsiyasi kongressi bo‘lib o‘tadi. Bu kongressda bolalarning bardamligi va baxt-saodatining kafolati bo‘lgan mustahkam tinchlikni ta'minlash uchun doimiy kurash haqidagi shior yangradi. Urushdan keyingi davrda sayyoramizda yashovchi barcha mitti bolajonlarning sog‘liq va xotirjamligini saqlash dolzarb muammoga aylanib qolgan edi. 1950-yildan e'tiboran 1-iyun Xalqaro bolalarni himoya qilish kuni sifatida nishonlana boshladi.

  1989-yilda BMT Bosh Assambleyasi bolalar huquqlari to‘g‘risida Konvensiya qabul qildi. Unda butun dunyo mamlakatlari bolalar huquqlarini himoya qilishi lozimligi haqida xalqaro talab va takliflar yozilgan.

  Xo‘sh, Xalqaro bolalar kuni qanday nishonlanadi?

  Dunyoning ko‘pchilik mamlakatlari va shaharlarida bu bayram bolalar huquqlari va ularni himoya qilish haqida turli suhbatlar va ma'ruzalar o‘tkazish bilan nishonlanadi. Shuningdek, mazkur sanada turli-tuman quvnoq va madaniy ommaviy tadbirlar, sport musobaqalari, konsertlar o‘tkaziladi. An'anaga ko‘ra, shu kuni og‘ir bemor, davolanishga muhtoj va nogiron bolalar uchun xayriya aksiyalari va tadbirlar tashkil qilinadi.

  Bolalarni himoya qilish kuni bayramining maqsadi keng jamoatchilik diqqatini muammoli bolalarga, ularning huquqlarini himoya qilishga, himoyalangan dunyoda yashash imkoniyatlariga, baxtli bolalikka ega bo‘lishlariga va o‘z mamlakatining to‘la-to‘kis va xotirjam fuqarosi bo‘lib o‘sishlariga qaratishdir.

  Bir so‘z bilan aytganda, Xalqaro bolalarni himoya qilishi kuni bolalarni parvarishlash va ularning huquqlarini himoyalashga bag‘ishlangan bayramdir. MDH va boshqa bir qator mamlakatlarda ushbu bayram 1-iyunda, BMT tavsiyasi bilan esa 20-noyabrda nishonlanadi.

  Xalqaro bolalarni himoya qilish kuni butun dunyo bolalari uchun eng beg‘ubor va quvonchli bayram hisoblanadi. Albatta, bola bu dunyo, bu hayot mazmunining ajralmas qismidir. Bolalar o‘z tabassumlari orqali insonlar qalbida hayotga, yashashga bo‘lgan qiziqishni uyg‘otadilar. Ko‘zlarida ezgulik va mehr qalqib turgan bolajon musaffo osmonda erkin parvoz etayotgan qaldirg‘och misoli.

  Fursatdan foydalanib «O‘zbekiston milliy elektr tarmoqlari» aksiyadorlik jamiyati, Birlashgan kasaba uyushmasi qo‘mitasi barcha bolajonlarni, xususan yurtimiz kelajagi bo‘lgan yosh avlod vakillarini ushbu sana bilan samimiy muborakbod etadi.

  Bugungi pandemiya sharoitida bolajonlarga turli konsertlar, ko‘rgazmalar, sayillar, sport musobaqalari va turli xil tadbirlar o‘tkazish birmuncha chegaralangan bo‘lsa-da, ota-onalar ularning yuzlariga tabassum baxsh etadigan o‘z e'tiborlari orqali mamnun etadi, degan umiddamiz.

  Darhaqiqat, dunyoda bolajonlar kulgusi-yu, sho‘x-shodon qiyqirig‘idan-da beg‘ubor narsaning o‘zi yo‘q. Tiniq nigohini sizga qadagancha olamdagi jamiki ajoyibotlarni o‘rganishga, mushohada qilishga urinayotgan bolakayning nurli chehrasiga boqqan har qanday inson hayot tashvishlarini unutadi. Zotan, farzandining saodatli va baxtiyor damlarini mudom ko‘rib yashash — har bir inson umrining asosiy mazmunidir.

Ulug‘bek Urunov,

  «O‘zbekiston milliy elektr tarmoqlari» aksiyadorlik jamiyati boshqaruv raisining matbuot kotibi — axborot siyosati masalalari bo‘yicha maslahatchisi

«O‘zbekiston MET» AJ Axborot xizmati

 t.me/uzmetaxborotxizmati