«O‘zbekiston–24» teleradiokanalida «Adiblar xiyoboni — ma’naviyat maskani» turkumi orqali efirga uzatilayotgan «Intervyu–24» sahifasining navbatdagi mehmoni — Orif To‘xtash – shoir, «O‘zbekiston milliy elektr tarmoqlari» aksiyadorlik jamiyati boshqaruv raisining ma’naviy-ma’rifiy ishlar hamda davlat tili masalalari bo‘yicha maslahatchisi bilan suhbatni e'tiboringizga havola etamiz.

  Ma’lumki, davlatimiz rahbarining 2017-yil 18-apreldagi qaroriga muvofiq, ma’naviy hayotimizda o‘chmas iz qoldirgan atoqli yozuvchi va shoirlarning tarixiy xotirasini abadiylashtirish, yosh avlodning madaniy-ma’rifiy saviyasini yuksaltirish maqsadida Milliy bog‘ hududida Adiblar xiyoboni barpo etildi.

  Ushbu xiyobon Alisher Navoiy haykali bilan uyg‘un bo‘lib, yaxlit me'moriy ansanbl hosil qilishi uchun yangi loyiha ishlab chiqilgan edi. Unga ko‘ra, 8 gektardan ziyod hudud obodonlashtirilib, Alisher Navoiy haykalini qayta o‘rnatish belgilangandi.

  Mana, shu kunlarda Alisher Navoiy nomidagi O‘zbekiston Milliy bog‘ida barpo etilgan Adiblar xiyoboni bugun o‘ziga xos yangi qiyofaga kirdi. Prezidentimiz Shavkat Mirziyoyevning tashabbusi va g‘oyasi asosida bu yerda ulkan qurilish va obodonlashtirish ishlari amalga oshirilib, katta maydonda Adiblar xiyobonining yaxlit me'moriy ansambli yaratildi. Adiblar xiyobonini g‘oyaviy­badiiy jihatdan yanada boyitish maqsadida Bobur, Ogahiy, Berdaq, Muqimiy, Furqat, Behbudiy, Avloniy, Cho‘lpon, Qodiriy, To‘lepbergen Qayipbergenov, Ibroyim Yusupov, Aleksandr Faynberg singari atoqli namoyandalar xotirasiga bag‘ishlangan yangi yodgorlik majmualari ham yaratildi.

  Joriy yilning 20-may kuni Prezidentimiz Adiblar xiyoboniga tashrif buyurib, bir guruh ijodkorlar bilan uchrashdi hamda ushbu qutlug‘ maskanning ijtimoiy-ma’naviy hayotimizdagi o‘rni va ahamiyati qanday bo‘lishi kerakligini aniq-ravshan tushuntirib berdi. «Bu joy xalqimiz, ayniqsa, yoshlarimiz qalbiga adabiyotni, u orqali, ma’naviyat, ma’rifat va madaniyatni olib kiradigan tabarruk dargoh bo‘lishi lozim», deya ta’kidladi Yurtboshimiz. Milliy adabiyotimiz va madaniyatimiz ravnaqiga ulkan hissa qo‘shgan ulug‘ ustozlarimizning muhtasham haykallari qad rostlagan, har bir qadamida ularning donishmand nigohi, beg‘ubor nafaslari sezilib turadigan bu mo‘tabar maskanga «Adiblar xiyoboni» deb nom berilganining o‘zi juda chuqur hayotiy, ilmiy-falsafiy asoslarga, ma’no-mazmunga ega.

  Shu ma’noda, bu xiyobon o‘ziga xos noyob va betakror dargohdir.

– Bu yerdagi har bir haykal adabiyotimiz tarixida alohida bir voqea bo‘lgan, yorqin iz qoldirgan tabarruk siymolarni aks ettiradi. Har bir monumental obida o‘zining badiiy-falsafiy jihatlari bilan bizga buyuk bir tarix, adabiyot va ma’naviyat haqida, qudratli milliy ruh to‘g‘risida hikoya qiladi. Biz, ijodkorlar bu yerga kelib o‘zimizga yangi ruh va ilhom, ma’naviy qudrat olamiz, – deydi Yozuvchilar uyushmasi a’zosi, shoir, «O‘zbekiston milliy elektr tarmoqlari» AJ boshqaruvi raisining ma’naviy-ma’rifiy ishlar hamda davlat tili masalalari bo‘yicha maslahatchisi Orif To‘xtashev. Qizg‘in ruhdagi kechinmalar tafsiloti bilan «O‘zbekiston 24» telekanali tomonidan uyushtirilgan maxsus suhbat asnosida tanishishingiz mumkin.

© «O‘zbekiston–24» telekanali

© Suhbatdosh jurnalist Sadoqat Ochilova

«O‘zbekiston MET» AJ Axborot xizmati

 t.me/uzmetaxborotxizmati