Prezident Shavkat Mirziyoyev 15-mart kuni Qashqadaryo viloyatida hamda respublika suv ta'minoti, elektr energiyasi yetkazib berish sohalarida joriy yilda amalga oshiriladigan investitsiya loyihalari taqdimoti bilan tanishdi.

  Yuzaga kelayotgan elektr energiyasidagi yetishmovchiliklarni bartaraf etish maqsadida O‘zbekiston va Tojikiston energetika tizimida hamkorlik yo‘lga qo‘yilmoqda. Ya'ni aholining elektr energiyasi iste'moli ortgan vaqtda yuzaga keladigan talab shu orqali qondiriladi. Energetika tizimida bajariladigan bu loyiha uchun jami 14,7 mln dollar mablag‘ yo‘naltiriladi.

  Taqdimotda ishtirok etgan Kun.uz muxbirining xabar berishicha, «O‘zbekiston milliy elektr tarmoqlari» AJ boshqaruv raisi Dadajon Isaqulov Tojikiston bilan uzilgan elektr liniyasi 2021-yilda qayta tiklanayotgani haqida gapirdi.

  «Hozirgi kunda O‘zbekiston energetika tizimi Tojikiston bilan parallel ishlamaydi. O‘rtada 64 km liniyamizni bir paytlar demontaj qilib olgan edik. Endi shuni qayta tiklayapmiz. Tojikistonda suvdan olingan elektr bilan kechki maksimumlarni qoplashga va Tojikiston bilan parallel ishlash uchun qulay sharoit yaratadi.

  64 km liniyani qurib bitirishga 14,7 mln dollar sarfalanadi va Tojikistonning Regar stansiyasi bilan o‘zimizning Surxon podstansiyasini bog‘laymiz», – deya joriy yilgi rejalar haqida ma'lumot berdi «O‘zbekiston milliy elektr tarmoqlari» AJ boshqaruv raisi Dadajon Isaqulov taqdimot paytida.

https://kun.uz/uz/news/

"O'zbekiston MET" AJ axborot xizmati

t.me/uzmetaxborotxizmati