O‘ZBEKISTON RESPUBLIKASI QONUNI

AXBOROT OLISH KAFOLATLARI VA ERKINLIGI TO‘G‘RISIDA

 

1-modda. Qonunning maqsadi

Ushbu Qonun har kimning axborotni erkin va moneliksiz izlash, olish, tadqiq etish, uzatish hamda tarqatishga doir konstitutsiyaviy huquqini amalga oshirish jarayonida yuzaga keladigan munosabatlarni tartibga soladi.

2-modda. Axborot olish kafolatlari va erkinligi to‘g‘risidagi qonun hujjatlari

Axborot olish kafolatlari va erkinligi to‘g‘risidagi qonun hujjatlari O‘zbekiston Respublikasi Konstitutsiyasidan, ushbu Qonundan va boshqa qonun hujjatlaridan iborat.

Qoraqalpog‘iston Respublikasida axborot olish kafolatlari va erkinligi sohasidagi munosabatlar Qoraqalpog‘iston Respublikasining qonun hujjatlari bilan ham tartibga solinadi.

3-modda. Axborot olish kafolatlari

Har bir fuqaroning axborot olish xuquqi kafolatlanadi.

Har kimning axborotni izlash, olish, tadqiq etish, uzatish va tarqatish huquqi davlat tomonidan himoya qilinadi.

4-modda. Axborot olish erkinligining asosiy prinsiplari

Axborot olish erkinligining asosiy prinsiplari axborotning oshkoraligi, hamma olishi mumkinligi, ochiqligi va haqqoniyligidan iboratdir.

5-modda. Axborot olishga doir so‘rov

Har kim axborot olishni so‘rab bevosita o‘zi yoxud qonuniy vakillari orqali murojaat etish huquqiga ega.

Oldingi tahrirga qarang.

6-modda. So‘rovning shakllari va uni qarab chiqish muddatlari

Axborot olishga doir so‘rov og‘zaki, yozma shaklda, shu jumladan axborot tizimi orqali elektron shaklda ifodalanishi mumkin.

Yozma so‘rovda murojaat etuvchining ismi, otasiniig ismi, familiyasi, manzili, so‘ralayotgan axborotning nomi yoki xususiyati ko‘rsatiladi.

Yozma so‘rovda murojaat etuvchining elektron manzili ko‘rsatilishi mumkin. Yozma so‘rovda elektron manzilning ko‘rsatilganligi murojaat etuvchining so‘rovga axborot tizimi orqali elektron shaklda javob olishga bo‘lgan roziligidir.

Yozma so‘rovlar, shu jumladan elektron hujjat tarzida yuboriladigan so‘rovlar ro‘yxatdan o‘tkazilishi shart.

So‘rovga iloji boricha qisqa muddatda, agar qonun hujjatlarida boshqa hol nazarda tutilgan bo‘lmasa, so‘rov olingan sanadan boshlab o‘n besh kundan kechiktirmay javob qaytarilishi kerak.

Og‘zaki so‘rovga, imkoniyatga qarab, darhol javob berilishi shart.

Agar so‘rov tushgan organ yoki mansabdor shaxs so‘ralayotgan axborotga ega bo‘lmasa, murojaat etuvchiga bu haqda so‘rov olingan sanadan boshlab yetti kundan kechiktirmay ma’lum qilishi, shuningdek, imkoniyatga qarab, unga bunday axborotga ega bo‘lgan organning yoki mansabdor shaxsning nomini ma’lum qilishi shart.

(6-modda O‘zbekiston Respublikasining 2015-yil 29-dekabrdagi O‘RQ-396-sonli Qonuni tahririda — O‘R QHT, 2015-y., 52-son, 645-modda)

Oldingi tahrirga qarang.

7-modda. Axborot olishni ta’minlash

Davlat organlari, fuqarolarning o‘zini o‘zi boshqarish organlari, jamoat birlashmalari, korxonalar, muassasalar, tashkilotlar va mansabdor shaxslar har kimga o‘zining huquqlari va qonuniy manfaatlariga daxldor bo‘lgan qonun hujjatlari bilan, shuningdek hujjatlar, qarorlar va boshqa materiallar bilan tanishib chiqish imkoniyatini yaratib berishga majburdir. Axborot olish imkoniyati qonun hujjatlarini va tegishli materiallarni e'lon qilish va tarqatish yo‘li bilan ta’minlanadi.

(7-modda O‘zbekiston Respublikasining 2000-yil 15-dekabrdagi Qonuni tahririda — Oliy Majlis Axborotnomasi, 2001-y., 1-2-son, 23-modda)

8-modda. Axborot berish va unga haq to‘lash

Murojaat etuvchining xuquqlari va qonuniy manfaatlariga daxldor axborot uning so‘roviga binoan tekinga beriladi.

Boshqa axborotni berganlik uchun tomonlarning kelishuviga muvofiq haq olinishi mumkin.

9-modda. Taqdim etilishi mumkin bo‘lmagan axborot

Davlat organlari, fuqarolarning o‘zini o‘zi boshqarish organlari, jamoat birlashmalari, korxonalar, muassasalar, tashkilotlar va mansabdor shaxslar davlat siri yoki qonun bilan qo‘riqlanadigan boshqa sirdan iborat axborotni berishlari mumkin emas.

10-modda. Axborot manbaini oshkor etmaslik

Ommaviy axborot vositalari axborot manbaini va taxallusini qo‘ygan muallifning kimligini uning roziligisiz oshkor etishga haqli emas. Axborot manbai yoki muallifning kimligi faqat sud qarori bilan oshkor etiladi.

11-modda. Axborotning to‘g‘riligi uchun javobgarlik

Ommaviy axborot vositalari e'lon qilinayotgan axborotning to‘g‘riligini tekshirib ko‘rishlari shart va ular axborot beruvchi bilan birgalikda uning to‘g‘riligi uchun qonun hujjatlarida belgilangan tartibda javobgar bo‘ladilar.

12-modda. Shikoyat qilish huquqi

Davlat organlarining, fuqarolar o‘zini o‘zi boshqarish organlarining, jamoat birlashmalarining, korxonalar, muassasalar, tashkilotlar va mansabdor shaxslarning fuqarolarning axborot olishga doir huquqlarini kamsituvchi xatti-harakatlari yoki harakatsizligi ustidan sudga shikoyat qilinishi mumkin.

13-modda. Axborot olish huquqini buzganlik uchun javobgarlik

Axborot olish xuquqining buzilishida aybdor bo‘lgan shaxslar qonun hujjatlariga muvofiq javobgarlikka tortiladilar.

14-modda. Axborot olish kafolatlari va erkinligi sohasidagi xalqaro shartnomalar

Agar O‘zbekiston Respublikasining xalqaro shartnomasida ushbu Qonunda nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

 

O‘zbekiston Respublikasining Prezidenti I. KARIMOV

Toshkent sh.,

1997-yil 24-aprel,

400-I-son

 

(O‘zbekiston Respublikasi Oliy Majlisining Axborotnomasi, 1997-y., 4-5-son, 108-modda; 2001-y., 1-2-son, 23-modda; 2015-y., 52-son, 645-modda

 

Manba: http://lex.uz/docs/1319

 

«O‘zbekiston milliy elektr tarmoqlari» AJ Axborot xizmati:

+998 71-208-5598; 71-236-6808

 t.me/uzmetaxborotxizmati