Avval xabar berganimizdek, «O‘zbekiston milliy elektr tarmoqlari» aksiyadorlik jamiyati balansida bo‘lgan magistral elektr tarmoqlari hamda yuqori kuchlanishli podstansiyalarda 2024/2025-yil kuz-qish mavsumidagi taʼmirlash-sozlash hamda navbatdan tashqari nazorat ko‘riklari o‘tkazilmoqda.

Misol uchun, «Toshkent magistral elektr tarmoqlari» filiali tarkibidagi 220/110/10 kV kuchlanishli “Sirg‘ali” podstansiyasidagi AT-1 transformatorida navbatdan tashqari nazorat ko‘rigi o‘tkazilib, aniqlangan kamchiliklar bartaraf etildi. Transformatorning yog‘ sathi, sovutish uskunalari hamda himoya tizimlari meʼyoriy ko‘rsatkichlarga olib kelindi.

Shuningdek, texnik-muhandislik nomi L-Ch-T-2 bo‘lgan 220 kV kuchlanishli hamda texnik-muhandislik nomi L-5-Yu-2 bo‘lgan 110 kV kuchlanishli elektr tarmog‘ida joriy taʼmirlash ishlari olib borilib, liniyaning shleyf ulanmalarida aniqlangan kamchiliklar bartaraf etildi, izolatorlar hamda qushlar qo‘nishiga qarshi moslamalarning sozligi tekshirilib, yangi elektr jihozlari o‘rnatildi,

⚡️ Nazorat ko‘riklari va taʼmirlash-sozlash ishlari mamlakatimizning boshqa hududlarida ham olib borilmoqda. Magistral elektr tarmoqlari hamda 220–500 kV kuchlanishli podstansiyalar barqaror faoliyati uchun barcha kuch va resurslar safarbar etilgan.

Eslatib o‘tamiz, 220/110/10 kV kuchlanishli “Sirg‘ali” podstansiyasi 2020-yil may oyida foydalanishga topshirilgan bo‘lib, podstansiyaning o‘rnatilgan quvvati 400 MVAni tashkil etadi. Podstansiya 2 ta 220 kV kuchlanishli liniya orqali taʼminlanib, undan 4 ta 110 kV kuchlanishli elektr uzatish tarmoqlari chiqqan. Mazkur energetika obyekti mamlakatimiz poytaxti va Toshkent viloyatidagi bir nechta tumanda yashovchi isteʼmolchilar hamda sanoat korxonalari elektr taʼminoti ishonchliligini taʼminlaydi.

‖ Facebook ‖ Инстаграм ‖ YouTube

«O‘zbekiston MET» AJ Axborot xizmati

http://t.me/uzmetaxborotxizmati